Calzoniando ent'o lusco

O camino d'a tardi boi nantando

entre caxicos negrals como o carbón

con escarzos pretaus en bel escorchón

e molsa en retalinia arrepinchando.

En a rebuelta as bisas ban bandiando

as fuellas que no'n saben garra canzión,

xutas en as tallas, xuto o corazón,

con a fuen d'Algueta á coté manando.

Se mueben rapedas as chinchiperas

que negretas caminan ent'o lusco

en do escansarán as oras zagueras.

En a selba un ferrero chiquín busco

entre os muxons que poblan as bosqueras,

pero o diya mingua e se torna fusco.

«Calzoniando ent'o lusco, caminando hacia el anochecer; nantando, apresurando; caxicos, robles; escarzos, líquenes; escorchón, erosión; molsa, musgo; xutas, resecas; á coté, al lado; chinchiperas, carboneros (ave); un ferrero chiquín, herrerillo (ave);  bosqueras, espesuras; o diya mingua, el día acorta; se torna fusco, se vuelve oscuro».