Mullers de mayo

A la Birxen de Semón

la carrían en a piana

entre cantas e rezos

cuatro mullers embrecadas.

En a semana de mayo,

en a primerenca d'o mes,

cuan as flors d'o tremonzillo

salen en os mons d'Azeré.

A birxen camandulera

ba en bolandas mui goyosa

bistida de saya blanca

portiada por rezias mozas.

En prozesión china-chana

con a mosica sonando

os pendons dreitos e luengos

e a catafila blincando.

¡Mai, leba-me ta l'armita

que m'aiman as flors de lin,

replegar l'azul d'o zielo

que bordía en os camins!

«Flors, flores; birxen, virgen; Semón, un antiguo poblado íbero; carriar, acarrear; piana, peana; cantas, canciones; embrecadas, comprometidas; tremonzillo, tomillo; mons, montes; camandulera, parrandera; en bolandas, por el aire; saya, vestido; portiar, transportar; rezias, fuertes; china-chana, sin detenerse; dreito, recto; luengo, largo; a catafila, los acompañantes; mai, madre; leba-me, llévame; armita, ermita; m'aiman, me gustan; flors de lin, flores del lino; replegar, recoger; bordiar, bordear; camins, caminos»

«En que remata a misa en l'armita de Semón bi ha costumbre de puyar en o campanal a repicar as campanas. De contino acuden a minchar madalenas u pastas con un beire d'anís u moscatel en casa d'o santero que bi ye apegada a costau. Os bisgüelos Chuan Crisostomo e Ventura bi estieron de santers, dimpués tío Carrateo pai e fillo y en zagueras Minguillón. Criaban pirinas e coniellos en o zerro e as chens d’os cuatro lugars lis daban lana, bel cuartal de trigo u morziellas e fardels de matazía. Chuan morié en l'armita d'una esbinzadura e o güelo Daniel se'n baxé ta Azeré con o ganau. Ne bendié firme estallo e con os diners cabidaus merqué una casa en a Replazeta. Aquí tenié toros e güellas entre que a güeleta María espachaba en a tabla (carnezería). Un diya que benié Chuan Crisotomo a bier os fillos so no se’n trobé que a la nieta chiqueta que a l’arreo lis ne fazié notorio d’ista traza: “l’agüelo Venturo sen fo, vengó y sen fo” e no bi aturé con iste retruque dica que se'n quederon combenzitos e informaus. Rai, de tornada se bandían os pendons en o Paradero y en a plaza la ilesia. En l'afoto de abaxo Elías ye bandiando-ne uno con tiento e rasmia a coté d'o pilón (fuen con cumo) enfrén d'a piana d'a birxen en o Paradero. Os mosicos d'ista añada se'n son baxaus de Zimballa».