Sospiros d'una mai

«Quis possit lacrimis æquāre labores?» Publius Virgilius Maro, "Eneida II".

(¿Quí poderba abastar con glarimas as sufrienzas?)

Margalidas amariellas

en a peaina ateseradas;

lidios blancos, flos bioletas;

e alto tres cruzes fincadas.

Ya se siente a torrumbesca,

tertula l'aire á racadas;

ya se meten en ringlera

capiellos e sayas pardas.

Colós d'a semana santa

que en primabera enzetán

implen con rasmia as penas

d'ensine riguridá.

Debaxo a cruz, con delera,

clabels royos d'o Rei Siñor;

debán comboyan os blancos,

sospiros d'a mai de Dios.

Regostaus tamborinaires

atochan bombos e tambós;

en os balcons e carreras

esparpallan os corazons.

  

«Margalidas, margaritas;

peaina, peana;

ateseradas, bien dispuestas;

torrumbesca, ruido de tormenta;

a racadas, a rachas;

enzetán, incipiente;

ensine, insigne;

riguridá, severidad;

comboyan, atraen simpatía;

regostaus, ufanos;

tamborinaire, tamborilero;

esparpallan, sobresaltan».