De cabañera

Por do yo i boi

ban as mías güellas

por do yo i campo

o mon e as estrelas.

Con paso amonico

cabilando en ellas

con tocho e batiaguas

e cans que las menan.

Enrique me digo,

de Cueba d'Agreda;

una milenta en porto,

ramada de cabañera.

De o Moncayo t'o plano

e lugo de bezibersa;

me'n baxo d'ibierno

e puyo en primabera.

Las lebo por berdes praus

d'as faxas por os berals;

son bedaus os trigazals

que i quedan de restollera.

Me debanto a lo clariar,

en que o diya rebella;

las reconto d'una en una

cuan blincan d'a paidera.

Ellas me ban dezaga

pataquiando as güebras;

yo nunca i boi solo

cuan caminan, belan.

«De cabañera, en trashumancia;

güellas, ovejas;

tocho, bastón;

batiaguas, paraguas;

cans, perros;

menar, conducir;

ramada, rebaño;

me'n baxo d'ibierno, bajo durante el invierno;

berals, orillas;

restollera, rastrojo;

a lo clariar, al hacerse de día;

paidera, paridera;

pataquiando, pisoteando;

güebras, barbechos;

belan, balan».

O sol en o mentidero

En as tardis caldiadas de frebero

que os cazataires se'n ben de cazata,

s'arreplega o sol en o mentidero

de do eslampa a sinrazón embrecata.

Por denzima os buxacos d'o ripedo

os güeitres chiran escando carnuza,

e os caxicos blandían un espedo

pa esfurriar tanto azacán de minchuza.

Bi ulora á sangre de chabalín caíto

á escarzo sunsiu e á yerba buena

zurrastriau por os ombres que lo amuelan.

Entre allagas dexa con muita pena

tacas royas, birabolas que buelan,

rastro en lapiza d'o zaguer tremito.

  

«Caldiadas: templadas;

frebero: febrero;

se'n ben: se van;

cazata: caza;

embrecata: implicada;

espedo: hierro largo;

azacán: ambición;

lapiza: piedra grande lisa;

tremito: espasmo ».

O pino Guitón

En o bedau de Peñaflor

as llebres de mata en mata

blincan os romers en flor

que crexen baxo a pinada.

As ringleras de tamariz

han trallos biellos e queraus

que as fuxinas de berano

e as cheleras han malfarchau.

Aquí as brancas de colors

s'ateclan con l'agüerrada,

soros satinaus e naranchas,

e a chinestra espeluchada.

Alcazias a la seguida

con as fuellas sin d'anchelez,

en ringleretas paradas

ta que i chugen a conellez.

Cabezo berdal escuro

embrecau a caramullo

con tremonzillo e sisallos

barrechaus en empandullo.

Artos, pinos e chinebros

en secatibo salobre

e miles de paxaricos

de borina en tierra pobre.

Y entre os pinos más grandaz

bi espunta o pino Guitón

do gosa posar-se a rapaz

ta aguaitar ratons de mon.

Aire e sol a mogollón

desento andurrial plomizo

e de contino azuls flors;

¿cale estar más monterizo?

«Baxo a pinada: bajo el pinar;

ringleras de tamariz: filas de tamarisco;

queraus: carcomidos;

fuxina: calor sofocante;

cheleras: heladas;

alcazias a la seguida: acacias a continuación;

berdal: verdoso;

fuellas sin d'anchelez: hojas sin angelitos (flores blancas);

chuguen a conellez: juegen a hacer pizcos con las hojas y soltarlos;

en secatibo salobre: en árido salitre;

bi espunta o pino Guitón: despunta el pino Guitón (ejemplar catalogado);

guitón: pícaro;

aguaitar: acechar;

desento: vacío;

andurrial; paraje alejado;

monterizo: montañoso».

Carrasca

¡Buen día! dizié l'aire a una carrasca.

¡Buen día! li refeté a más zereña

creyatura que acucuta en as peñas:

ponchuda, guallarda y enzenegada.

Si sofla zierzo que chela l'aliento,

lo enduras, tu no te'n permenas guaire.

Si traigo d'o sur fuxina que o diaple

tira d’o propio infierno, ¡tu en susiego!

Allora, di-me: ¿qué he que fer pa que rebles?

Por zientos as añadas a bier-te i biengo

dica istas crenchas de Santificatuero,

e perén te trobo beroya: ¿qué ofrexes?

Pincha e zerrina en a lastra i fo planto,

o zierzo escuso e li puncho con as fuellas:

duras d'un lau e con diens en as puntetas;

e alzo a frescor d'a luna en l'otro canto.

  

«refeté, contestó

ponchuda, ahuecada

guallarda, exuberante

enzenegada, obstinada

no te'n permenas guaire, no te inquietas mucho (de eso)

tira, saca

¿qué he que fer?, qué tengo que hacer

alzo a frescor, guardo la frescura».

Olibera

En un tozal de Torrero

i dexón una olibera

a o cudiau de lurdos pinos.

Nobenzano palo plagau de crostas

montesina de torrumbero, sostras.

De olibetas castañetas, no'n guaires;

pero son as tuyas berdencas fuellas

d'o zielo fantesiosas falagueras

que enfuelgan mesmo a las almas más pretas.

«Mons, montes; olibera, olivo; a o cudiau, al cuidado; lurdos, torpes; nobenzano, novato; crosta, costra; montesina, montaraz; torrumbero, derrumbadero; sostras, desaliñada; de olibetas castañetas, olivas inservibles (bordes); no'n guaires, tan apenas tienes; berdencas, verdosas; fuellas, hojas; fantesiosas falagueras, presuntuosos caprichos; enfuelgan, alegran; mesmo, incluso; pretas, encogidas».

Encantaria

Encantaria ye una parola benasquesa que seguntes vox populi sinifica bruja o hechicera. D'ista segunda azeuzión a RAE cuaterna que ye "quien o que por su hermosura, gracias o buenas prendas atrae y cautiva la voluntad y cariño de las gentes".

«Ista encantaria ye l'autora d'o blog Rimas Curtas, amás d'un tresoro».

  

O churau d'o I CONCURSO LITERARIO EN ARAGONÉS «O REINO D’OS MALLOS» (2013)

ha dau notorio d'a ganadora y d'os ganadors:

Oscar Latas Alegre en narrazión curta por "1911. Cartas dende Uesca".

Chesús Aranda en poesía por "Encantaria".

Chesús Botaya Estaún en obras curtas de teyatro por "Siñor Chuan, de Casa o Farto"".

Pedro Calvo Borau premio espezial d'a Galliguera u Sotonera por "Dende os güellos de Firé".

Iris Orosia Campos Bandrés menzión espezial por a narrazión "Liria u a falordieta d’o sieglo XXI"

Andrés Castro Merino menzión espezial en poesía por "Contrabersos. Chiquetas istorias"

Iste premio ye acotraziau por l'Asoziazión APIAC con a colaborazión d’os Conzellos d’Ayerbe, Biscarrués, Lobarre, Morillo de Galligo, Santolaria de Galligo, As Peñas de Riglos, e d’as asoziazions Consello d’a Fabla Aragonesa y Nabaters d´a Galliguera.

¡Parabiens!

Perera

Una eslanguida perera

malfarchada por a nafra

que nomás o tiempo malba,

con crosta dura e zereña

de piez ta cabeza armada

pa no reblar ni carranquiar,

plantada en metá bi yera

d'una artica que mugaba

con l'ortal que un mesache eba.

En que enzeta a primabera

e as primeras calors s'alternan

con diyas de boiras pretas,

con premiso d'a zierzera

bi espuntan en as confluenzias

d'as brancas, raspias forquetas,

bes baxas de onda buena,

flocons de blancor zanzera

que ascape en frutos se trucan.

O fagüeño en debantera

á ormino carría plebias

e bella bez sofla bernera

que traye aguaruxiaderas.

O mesache ista encomienda

li fazió a l'ombre l'artica:

«si rancases a perera

ya ixorticarbas a faxa

toda pa aber-bi buenas trunfas».

L'ombre li empentó a tornada:

«nunca no tallaré l'árbol

que pa os muxons fa de casa,

no pienso estar tan ababol

pues no en fa de cosa mala

e con o fagüeño e o sol

ufre as más dulzes peras

que me he trobau en istos mons

y en todas as redoladas».

  

«eslanguida perera: flácido peral.

o tiempo malba: el tiempo pervierte.

bes baxas de onda buena, uves de buen tirachinas.

o fagüeño en debantera, el favonius el primero.

aguaruxiaderas, aguaceros.

ya ixorticarbas a faxa, ya podrías roturar la parcela.

trunfas, patatas.

no en fa de cosa mala, no hace nada malo».

Caxico biello

Berdía en a parti norte,

zereño e zentenario,

¡cuánta polideza en mayo!

caxico biello d'o cruze.

Amán d'o esbarre d'Aragüés

ta baxo d’o río Osia

puyando a costereta

que leba enta Santa Isabel.

Dende astí ambista luenga

entre carrascas, buxacos,

artos e chaparros tintaus

d'as colors de nuestra tierra.

Cara l'Aragón Subordán,

aquí me quedo aposentau

denzima d'os poyos paraus

por a chen d'istos lugars.

Prexino con tu, ¡caxico

biello!, con a birxen debán,

¿ye más polida la mar?,

pues si fa falta la empento.

Sabina albar

En Alcubierre a más pincha e beroya

d'a selba que reberdía en ixe mon

yera una fermosa sabina que eba

á coté d'ella un pino e un chinebro.

O chinebro que yera muito fino

li enchugardiaba como un cardelino

pos yera chobenastro e ristolero

e con bonicas zerras repinchadas.

De cara bi eba un pino fantuchero

que se reconcomeba a pur d'imbidia

e querau por os zelos un buen diya

li fabló d'ista traza a la sabina:

«Has que mirar-te-me a yo e fer-me causo

porque si no lo fas, con una mica

de bisco faré besque e os paxaricos

que t'aiman s'apegarán e morirán».

«No te'n faigas que te comboyaré a tu,

dexa que os muxons espardan as simiens

que de diya i seré de buena planta

e de nueis, cuan escurexca, escansaré».

Con ista estruzia a polida sabina

tenió toz os paxaricos que'n querió

e a selba de fillas chiquetas s'implió

que correban contentas por as ripas.